Havørnbonanza - ny kasterekord for havørnene
Det vart til saman 15 kast på to havørnlokasjonar denne første søndagen i juni. Det første paret samarbeidde ved at det stort sett var den eine, sannsynlegvis hannen, som hadde jobben med å hente opp fem fiskar av ulikt slag.
På veg til ein ny lokasjon lenger vekke vart det fiskestopp i nærleiken av vårt sårt sakna havørnpar. Der var likevel fiskelukka stor, og åtte fine paler i perfekt storleik hamna i fiskekassa. Dei skulle vise seg å vere gull verdt for ei havørn som i skytteltrafikk henta 10 fiskar! Da vi var tom, følgde den etter oss langs land før den forstod at vi var på veg heimover. Mellom kvar fiskehenting gjekk det ikkje meir enn to minutt før den landa i næraste furutopp, meir enn klar for neste fisk. Det reiret har lagra mat for mange dagar! Ei slik ivrig og nærgåande havørn har vi ikkje opplevd før. Den var i lufta før fisken landa, og vi måtte kjapt bytte frå 300mm til telezoomen 40-150mm, da vi ikkje fekk båten langt nok vekk før havørna sette klørne i fisken. Det var skikkeleg havørnbonanza, og igjen ei ny og morosam naturoppleving i lag med våre vener havørnene.
Det vart tatt alvorleg mange bilete denne dagen, nedanfor er nokre smakebitar.
Alle foto med Olympus/OM System OM-1, m.Zuiko 300mm f/4 Pro, MC-14 og 40-150mm f/2,8 Pro.