Havørn, snøre og tau
Det var gode forhold på sjøen i byrjinga av mars, med fleire fine og suksessfulle havørnturar. Den andre laurdagen i mars inviterte med sol og roleg sjø. Det måtte sjølvsagt nyttast, denne gong i lag med to gode fotovener i båten. Vi fiska først opp åtte paler. Med fleire snøre ute og ein kaptein som ikkje kommuniserer tydeleg nok når han bakker båten, så kan snøret fort kome i propellen. Det skjedde på denne turen, men det gjekk bra, denne gongen og… Trikset er å vri propellen i rett retning sånn at snøret vert frigjort. Seinare på dagen, i 22 knops fart, skar båten brått ut. Eit kraftig tau hadde kveila seg rundt motorstammen. Det gjekk heldigvis bra med motoren. To sånne “snørehendingar” er uvant kost, men eg tenker ofte på kva som kan liggje og flyte i sjøen som ein ikkje ser frå båten.
Vi var innom fleire reir denne dagen og. Ved det første reiret vart det to kast til hannen. Hoa viste seg, men ville ikkje hente. Det verkar på dette paret at det i hovudsak er hannen som hentar maten. Det har vi sett fleire gonger. Hannen observerer vi fleire gonger kikkar etter maken når han har landa ein fisk på land. Ved det andre reiret var det inga teikn til havørn. Båten sette difor kurs mot eit tredje reir, og her vart eit fiskemåltid helsa velkomen. Alt i alt ein ny flott tur på fjorden. Med våren i anmarsj er det god balsam for både fotoapparat og sjel å ha ein heil dag på sjøen i lag med våre fjørkledde vener.
Alle foto med Olympus OM-1, m.Zuiko 300mm f/4 PRO. Takk for at du svinga innom, og legg gjerne inn ein kommentar nederst!