Makrofotografering neste?

29. juni

For eit par år sidan kjøpte eg eit brukt makroobjektiv, M.Zuiko 60mm f/2,8 Macro. Det er kjent for å vere eit svært skarpt makroobjektiv, i tillegg til å vere lite (8 cm langt) og lett (185 gram) med vèrtetting (IPX1). Det har vore lite brukt utandørs, og mest brukt for avfotografering av dias og negativfilm i kombinasjon med Valoi easy35.

På YouTube har eg følgd med på makrofotokanalar, og særleg svenske Micael Widell, som har den største kanalen med over 100.000 følgjarar. I det siste har eit par andre dukka opp på youtube-radaren, Stewart Wood og Jamie Spensley. Ein fellesnemnar for desse, og tydelegvis fleire andre makrofotografer, er at dei har gått over til Olympus/OM System. Årsaker til det er mellom anna Micro 43-formatet som gir god djupneskarpleik, relativt lite vekt for kamera, objektiv og blits, rask autofokus og fokusstabling i kameraet. OM System sin unike Pro Capture er og ein nyttig funksjon for å fange små insekter i flukt.

Det hadde vore kjekt å utforske makroverda nærare. Det er ein naturfotogenre som kan vere svært så kortreist, med insekter og plantar overalt, både ute og inne.

Nedanfor er utvalde foto frå eit kvarters test- og inspirasjonsrunde på plenen i hagen. Først og fremst for å teste utstyr og innstillingar, og forhåpentlegvis bidra til å byggje motivasjon for å utforske denne genren vidare. Her er svært mykje å lære framover!

Alle foto er handhaldt utan blits i skuggen frå sola. Opptakstinnstillingar er lagt inn under kvart bilde. Alle foto er med kontinuerleg autofokus og 10 b/s.