Otto rett imot

4. sep.

Søndag 24. august vart det igjen ein morgontur på sjøen med havørner og godt vèr i sikte. Vi kasta loss kl 08:00 og var tilbake to og ein halv time seinare. I mellomtida gjekk turen først til ein god fiskeplass den første timen. Der drog kapteinen opp den eine etter den andre fisken. Mest lyr, men òg nokre makrell. Mannskap Tore og Magne har sannsynlegvis kjøpt seg same sluken som kapteinen til neste tur!

Med god nok fangst i fiskekassa vart første havørnstopp hos Gyda og Tor med sine to ungar. I starten var det inga ørner å sjå. Men brått ga den eine ungen lyd frå seg, letta og landa eit stykke lenger borte under reiret. Den fekk servert ein makrell på land, men tok ikkje hintet og flaug ut av syne.

Da vart det å rette baugen i retning Gunda og Otto, som også har to ungar i år. Dei har vore bra aktive dei siste gongane dei har fått fisketilbod, så det var med forventning vi nærma oss. Vi vart ikkje skuffa, der dei henta opp 8-10 fiskar, inkludert makrell på land som Otto henta.

Det blir ofte mange like bilete, men denne gongen fekk eg ein fotoserie av Otto rett imot, jf tittelen på bloggen. Eg har ikkje fått havørner så rett imot, så det var moro å få det til denne gongen.