*Den eine årsungen til Gunda og Otto skrikande i svevet.*

Det var 20 dagar sidan sist havørnsafari da eit lovande vèrvindauge omsider opna seg søndag 17. august. Denne første turen i august starta kl 0900 og varte i seks og ein halv time. Med sol over knallblå himmel, var det berre nordvesten som ga minuspoeng. Vinden frå nord var likevel godt handterleg, sjølv om det vart ein rimeleg frisk overfart til Ottar sitt havørnrike. Han viste seg etter ei stund, og fekk henta seg ein opptint matbit. Så gjekk kursen vidare mot Gyda og Tor, med forventning om aktivitet av dei to ungane. Sist i juli sat den eine ungen ved reiret, medan den andre heldt lenger inne på land, ute av syne frå sjøen. Dessverre var det verken vaksne eller årsunge havørner å sjå, så det vart ein bomtur.

Da var det å setje kurs mot Gunda og Otto. Det første vi såg der var ein av ungane i svevet. Ikkje lenge etter dukka begge foreldra opp. Begge to var ivrige etter å hente fisk, og kom gjerne samstundes. Da var det gjerne Gunda som var dominerande i fiskeopptaket. Det gjekk med 10-12 fiskar til dei to ungane dei har fostra opp i år. Vi har ikkje sett begge ungane samstundes, men etter denne økta er vi heilt sikre på at det er to ungar.

Ein variant hos Gunda og Otto var å kaste eit par makrellar på land. Otto sat nyskjerrig og tolmodig rett over oss da eg la båten heilt oppunder land og kasta makrellen på land. Etter å ha kikka ned ei stund, så letta han og landa ved makrellen. Der tok han den i nebbet, letta og i svevet satte høgre klo i makrellen for vidare transport. Det vart ein ny og fin fotoserie som er vist nedanfor.

Kristian Nicholls var ny medfotograf i båten denne søndagen. Sjølv om han er Canon-mann, så fekk han audiens hos Olympus-duoen Tore Idsøe og meg, men med 10% påslag på bensinspleisinga. Det siste berre tull, sjølvsagt.

Ottar og Gunda leverte varene i dobbel forstand. Først og fremst fiskevarene til sine to svoltne og skrikande ungar. Så fotovarer til oss naturfotografar som kom heim med mange og varierte fotomotiv. Det siste gir mange fine kveldar med vurdering og redigering foran Mac`en. Denne gongen fekk eg prøvd ut ein ny rutine i bilderedigeringa. Etter ein prøveperiode med DxO PureRAW 5, kjøpte eg til slutt full lisens. I utgangspunktet var tanken å teste eigenskapane for støyreduksjon, men eg forstod etter kvart at programmet kanskje først og fremst er ein glimrande RAW-konverter. Det er nesten som bildet er ferdigredigert når det kjem tilbake til Lightroom. Bruker det da som plug-in til LR, men det kan også brukast som sjølvstendig program.

I august står sola lågare på himmelen, og det vart eit ekstra sterkt motlys med havørna seglande inn frå sør mot nordavinden. Det ga fine og varierte motiv. I tillegg vart det viktig å treffe på eksponeringa.